Zanin (zing dar 5 a ni tawh) chu ka private blog hlui, journal atana ka hman thin ka haichhuak fuh a.
Journal entries tam vak lo mahse khatih hunlaia ka awmdan min hriatchhuah tir a. Kum 11 lai a lo liam ve ta.
Pian phungah tlangval chu ni ve tawh mah ila ka la bo hle mai. Mi zakzum leh inthlahrung tak ka ni thin a, tleirawl awkward em em laiin sap ramah chhungkuain kan pem a. Insecurities, tlin tawk lohna hlirin ka khat. Keimahah, kan dinhmunah, engkim maiah hian insit reng rengin ka seilian chho a.
Sum kan nei lova, chutianga chhia pawh ni hauh lo kan inluah te pawh ka zahpui thin. Khawsak man a hautak a, ka nu zara kan chhungkaw inchawm ve theihna hna chhete kan nei a. Chu chu min in tihfai, house cleaning a ni. Inrinnia school kan chawlhin ka u nen ka nu leh pate kan pui thin a. He hna pawh hi ka zahpui hle a, ka hmelhriatten min hmu ang tih ka hlau thin.
High school ka zawh hnuin college application kan nghah chhungin semester khat ka awl a, kan lawina sap kohhranin Mizo refugees te tan part-time hna inhlawhna min siam sak a. An appointment te ka kalpui a, sap tawng mizo tawngin ka lehsak thin a. Gym ka kal tan a, ka inchei dan ka thlak tan bawk a. Tlem tlem chuan hma ka sawn. College pawh hi ka thiante chuan a tha leh a to ah te, state hrang hrangah te an kal a. Kei chu community college an tih, a tlawm ber chi ah bul ka tan.
College ka kal tan pawh chuan Mizo ho appointment kalpui chu ka chhunzawm zel a, sum tlem tlem a lo lut ve a. Ka nu leh pate an haw hnuin kan unau pawh kan awm hrang ta hlawm a, kei Mizo chhungkaw in pakhatah ka awm ve ta a. An ina room pakhatah ka awm a, an in bul lawkah college a awm avangin thil chu a awlsam phian. Zing lamah hnathawh a ngai thin si a, chhun/tlai lamah class ka kal a. Zan dar 10-11 velah te gym ka kal thin.
Ka hmalam hun hi ka han thlirin TUNAH ngat hi chuan beisei tur ka hrelo le.
Sikulah ka titha bawk si lo. Hnalam lah tam lo. Rethei. Speeding ticket man pe zo chiah. Ka chau reng nen. Taksa, khup na bawk si.
Kalna tur ka vai ruai e.
Kum 21 ka ni a, Georgia Perimeter College ah kalin Associate’s Degree ka ti mek a. College ka luh tirhin lehkazir ka ngai pawimawh hlawl lo. Gym, inkhelh leh hmeichhia. Ka tleirawl chhoh chhung zawngin hmeichhe lamah ka zei lova, an bula ka awm chuan ka tim vek zel. High school a ka thiante phei chuan i tuai em ni? tiin tum khat min zawh phah hial.
Hmeichhe lamah ka zei loh lutuk vang chuan tan lak angai a ni tiin ka inchhiar zau nasa. Gym ah leh mahni inenkawlna lamah ka hun tam zawk ka seng a. Lehkha zir ka ngaihtuah lo erawh chu ka buai phah ta reng a. School fees pekna tur ka nei lo fo. Ka hnathawhnain mamawh tak tak bak min chawm zo si lo.
Ka pate haw hma khan, tum khat phei chu college ah ka grade/score a chhe lutuk a scholarship ka hmu zo lo. Scholarship hmu tur hian 3.0 GPA a ngai a, 2.96 tih vel ka hmu. Algebra class ah test kan neih tumin, class thulhin Ethiopian restaurant ah Champions League inkhel en turin ka kal a. Test ka fail, class ka beihnawn a ngai, ka GPA a pawt hniam vek. Test kha a lo pawimawh tih hriat nachang pawh ka hre lo.
Tichuan semester fee pek a hun tawh si, kan nei bawk si lo. Zan tlaiah ka pain Mizo ho phone kualin fee pekna tur pawisa loan kan dil kual. A zahthlak duh khawp mai.
Chhungten tun semester chu scholarship hmangin kan pe ve thei tawh ang tia an lo duan lawk kha a nia. Online a fee pekna kan han en chuan scholarship a lo awm awzawng lo. A chhan zawt turkin kan hmelhriat pakhat college a thawk te an han call kual vel a. Kei lah a sirah lo awmin, ka fail chhan leh ka GPA in a tlin loh thu ka lo hre ru kur. Khami tum kha chu ka chhungte ka tibuai khawp mai. Hemi hnu hian lehkhazir pawh ngaihthah tawh lo turin ka intiam a.
Min hawsan hnu pawh chuan ka titha chho ve zel a, mahse class thenkhatah ka tichhe tan a. Ka rilru lah chu hmeichhe lamah hlir a ni bawk si. Tawng leta appointment kalpui hna chu kohhranin sum an nei tlem tawh a, ka insenso leh kan unau phone bill tih vel pek vek a ngai ve tho si a. House cleaning chu ka la chhunzawm zel a, tun tum chu ka in luah a an nu ber nen kan kal thin a. Intihfai tur/clients pawh an tam tawh lo. Mamawh bak min chawm zo lo.
Pawisa nei lo, college ah titha lo. Hmeichhe lamah chuan ka luck ve viau tawh mahse awmzia a awmin ka hre lo. Hmalam hun thlirin enge beisei tur awm chuang? Bei a dawng lek lek thin.
Nakinah ka blog hi ka chhiar let lehin, tun atanga Kum >1 years.
Pathianin ka tan hun ropui tak a ruahman.
Kum 11 hnuah ka han in reply ve leh ang e.
Engtin nge ka tih ang le…Tunah hian beidawng ta ila. Engtin nge ka hmalam hun a dang ang le. Beiseina sang tak nen ka bei zel ang.
Pathianin ka tan hun ropui tak a ruahman.
Lo beidawng ta la:
1. Nupui fanau I hmu lovang
I fanu duhawm tak mai chuan khawvel a hmu lo ang. A nu pum chhunga a nau la insiam mek pawh hian.
2. Hmeichhe lamah I fing harh lovang
Nakinah I lo upa deuh ang a, hmeichhe lama I miss out anga I feel na atang hian I lo fing ve deuh tawh ang. Pathianin mipa leh hmeichhia, innei tura a lo ruat pawimawhna i hmu chho ang. Tuna I thil tih chak thenkhatte chu inchhirnaah an la chang zawk ang.
3. I nunah sum leh pai I hmu hman lovang
Pathian malsawmna zarah leh I nupui support na in sum leh pai malsawmna i dawng ang a, i chhungte leh midang tana malsawmna I lo ni ang. Amaherawhchu kum eng emaw zat chu I lo broke rih phawt dawn nia.
College i kal laia an ina i awmna housecleaning pui thin tu che kha car accident a tawk a, a hriselna a tha lo. An chhungkua pawh an mumal theih loh phah lo a ni awm e. I zuk pui let thei zawk ang a, an pa in lawmthu tih tak zetin a la hrilh ang che.
4. Pathian i hre lovang
“Pathianin ka tan hun ropui tak a ruahman.” tiin ziak mah la i la ring tak tak chuang si lo. A khat tawkin Chawlhniah I inkhawm tawk. Tuna I chhiar thinte, an nun I awh thinte kha, nakinah chuan an upat tawh hnu feah an nunah Pathian tel lo chuan engmah awmzia a awm lo tih an hrechhuak.
Pathianin a siam danglam che a, thil ropui tak ti turin a duan che tih I hriat angai. Beidawn chang awm mahse, zan hi a ral anga naktukah ni eng a lo chhuak leh ang.
Beidawn kawng I thlang lova, thil tam tak tihsual nei mah ila vawiin thleng I thleng thei erawh chu ka chhuang hle mai che. Amaherawhchu harsatna hi kan pumpelh theih a ni lova, he khawvela kan damchhung hi chuan kan tawn tur a ni. Hlau lovin hmachhawn ngam zawk tur a ni.