Naupan lai atanga tleirawl lai zawng zawngin sum hi ka ngah ngai lo hrim hrim a. Naupan lai atangin car hi kan neih phak ka ring ngai lo. Kan inchhunga ka hriat zin em em, “pawisa kan nei lo”.
money doesn’t change a person, it reveals who they are
College kal pahin phak tawkin ka inhlawh chho a, sum tlemte hmangin ka in manage chho zel a. Ei leh inah pawh a man tlawm thei ang ber zelin. Tun thlenga ka hman tangkai tak sum budget dan ka zir phah nghe nghe.
College kal zawhah hna pangai ka han thawk a (hmun 100 chuangah ka apply), a hma ang loin hlawh chu a lo tam ta deuh a mahse mawhphurhna pawh a lo sang ta deuh zel a. Hausakna tham ni loin, nuamsa ve pangai a ni mai ang chu. Pawn dawrah ka indaih angem tih ngaihtuah ngai lovin ka ei chhuak ve ngam tawh.
Ka hlawh atangin sum ka khawl a, chhungte ka thawn a, in luah man leh a dang neuh neuh zawhah chuan tam chu a bang ta chuang lo.
Hun a lo ral leh ta deuh a Mizoramah ka haw ta a.
Kum 2 chhung meuh hlawh nei lovin, ka sum khawl sa (savings) hmangin kut hnathawkin ka hun ka hmang a. Inren thiam a ngai hle mai.
Tichuan ka nunah danglamna lian tak a lo thleng – nupui ka nei a, nau kan ken nghal avangin loh theih lohvin sum thawhchhuah a lo ngai a.
Company hna ka chhuahsan tawh avangin mahniin bul ka tan that leh a ngai a. Inneih sensoah ka inseng hnem a, ka savings lah chu a ral chak em em mai si a. Engtin nge ka chhungte ka chawm ang tih chu rilruah a lian duh hle.
Ka software/coding thiamna ka hman tangkai theihna tur online lama eizawn hna chu ka han dap chho a. A tirah web design hna zawngin mahni portfolio website ka siam a, clients hmuh tumin US a business hrang hrang email ka thawn chhuak teuh a. Ka hlawhchham.
Ngopa lamah KTP general conference ka kal hnuah ka zawng kual zel a.
Sum ah chuan tam ka nei tawh lo, mahse tum ka nei a. Ka pa/kan chhungkaw insakna hi ka sak zawh sak ang, tih leh ka chhungkua (ka nupui leh ka fa lo la piang tur) hi ka chawm hneh hle ang.
Theihtawp chhuahin nitin zantin darkar 15-18 hna ka thawk a. Zan lamah thawkin ni chhuak ka hmu ngai mang lova chaw ei nachang pawh ka hre lo. Thla 3-4 vel chu engmah ka thawk chhuak lo.
Ka mut atanga ka thawh chhungin rilruah hnathawh bak a awm lo. Pawn ka chhuahin ka phone ah ka chhunzawm bawk a. Ka men theih tawh loh tawpah ka mu ve hram. Ka fanu pian ni pawhin hospitalah laptop nen zankhuain ka thawk.
Hnathawh hah rah a lo lan deuhin ka pa insakna leh sawma pakhatah ka pe a. Engmah ka in lei lo.
Duhsakna avangin US a ka thawhna company hluiin, India lamah office kan hawng dawn a, I thawk duh angem, an rawn ti a. Helama an hiring manager nen kan inbiak chuan, online atangin i thawk thei ang a, helam (vai ram) ah i rawn kal ve zeuh zeuh chu a ngai thung ang. Thla khatah Rs 60,000 in i tan thei ang, a ti a. Kan inbiak zawh chuan US a ka supervisor hlui chu message ka zuk thawn a, min rawn la hriatchhuak avangin lawmthu ka sawi a, ka theih loh tur thu ka hrilh a. Midang hnuaia thawh ngai lova ka awm tawh chu ka lawm ru hle.
Christmas te a lo hnai a, kan nu in thawmhnaw i nei lo em mai tiin dawrah thawmhnaw min lei pui a. Thawmhnaw man tlawm deuh deuh te chu ka han lei ve ta hram a.
Chawl lova thla 9 meuh ka han thawh hnuah Christmas tuk ni 26 zanah chuan budget te ka tifel a. Ka bank a sum lut history, ka sum hman tawh te. Zanlai ni tawh mahse chutih lai tak chuan kan nu in eitur min lo siam sak a. Roomah chuan naute a muhil bawk a. Ka bultanna te ka han thlir let a, hnathawka ka rilru zawng zawng ka sen avangin han hahchawla thlir letna hun pawh ka nei ngai lo ti ka hrechhuak a. Kan nu chu ka bulah a lokal a, ei rawh, i ril te a tam ang, a tih chuan ngawi rengin monitor chu ka en reng a. Ka bank account history zawng zawng ka en a, ka tan tirha ka rilru hahna te ka hrechhuak a. Ka tawng chhuak thei lawk lo. Ka mittui hi a tla tep.
Mihring nun hi reiloteah a lo inthlak danglam thei hle. Dawr ka han lut a, duh duh lei theihna “feeling” chu a nawm ve chang chu a awm, mahse engmah hi ka lei ngai chuang lo. Dawrtea rs 5 man borai hi a ni deuh mai.
Sum ka han ngah tan deuh a, thinlungah chapona rilru a rawn awm tan a. Lal Isua inngaihtlawm leh thuhnuairawlh zia ka hmu a, zirtur ka la ngah hle tih ka hrechhuak.
Take my yoke upon you and learn from me, for I am gentle and humble in heart, and you will find rest for your souls.
– Matthew 11:29
Ka pawisa siam ka khawl zel avangin account pawh a lo lian chak a, tumah hrilh lo mah ila thenkhatin sawma pakhat pek atang ten an lo hre lo thei lova. Pawisa indil nen. A nuam ka ti lem lo.
Hun a lo kal zel a, Pathian zarah kan fa pawh naute duhawm tak a rawn ni chho zel a, mahse nupui ten post partum depression, rai zawha depression an tih te an rawn nei a. Kei lah hna lamah ka rilru ka la pe char char. Mahni nupuiten hrehawm an ti em em a, pawisa bak pek tur nei lovin ka inhria a. Rethei ka inti hle.
Pawisa hian thil tamtak a lei theih laiin lei theih loh pawimawh tam tak a nei.
Theihtawp chhuaha pawisa ka thawh chhuah laiin ka chhungte ka ngaihsak hman lova kan chhungkuain a tuar a. Mut leh ei ah ka inenkawl hman lova ka taksa hriselna in a tuar nasa hle bawk.
Sum leh pai hi a lo pawimawh hle mai. Sum hi a tel lova kan awm theih lohna khawvel a ni a, chutiang khawpa pawimawh hi a hman leh enkawl dan hi mi tam zawkin kan thiam lo niin a lang. Mamawh miah loh nei lo chung chunga lei te, sum vanga hrehawm ti, mahse mahni sum hman dan nun inthlak tum miah lo te a takah ka hmu hnem hle.
Sum enkawl dan hriat loh hi chuan puitlin pawh hi a lo har thin.
Nei lo atangin a “nei” ve thawkhatah ka tang tawh a, sum chuan rilru hahna tam tak chu a tikiang – sum neih loh vanga rilru hahna. Amaherawhchu engkim hi a lo ni lo.
Sum tam tak a siam theih, a chan leh vek theih tih pawh hi ka rilruah a awm reng.
A ngaihnawm in a hlawk thlak hle mai. I blog hi ka lo chang ve reng thin a. Line inang ta nanana chu inhmuh a la inkawm ka chak hle mai. I experience i lo share atang ringawt pawh hian hlawkpui tam tak ka nei thin. Fighting!