Diary: Brazilian Jiu-Jitsu

Brazilian Jiu-Jitsu (bjj) ka train duhna a rei tawh mai. Martial arts dang dang, hmingthang ve deuh mahse a taka hman tlak si loh ang ho a lo ni tih ka UFC en thinna atangin ka hria a.

Bjj ka train duhna chhan:

  • Self defense
  • Confidence

Gym pangai chu ka zawmna rei tawh mahse bjj gym ka zawm theih ngai loh chhan thenkhat:

  • Membership man a to – heihi a chhan lian ber
  • Gym location remchang ka hnaih lo
  • Zawm ka nervous

Vawi khat aia tam google maps ah ka awmna bula bjj gym ho zawng zawng ka en kual a, an website ah kalin thlatin membership fee engzah man nge tiin ka en thin a. $150 (~Rs 11275) aia tlawm chu a vang hle. Lungawi vak lovin website chu ka khar a, a dang ka en leh a. Hei pawh chuti tho.

Ka gym pangaiah thlatin $30 (~Rs 2255) vel ka pe thin a – gym ka hnaih mai bakah state chhunga branch dangah ka kal vek thei a. $30 pawh chu a to ka ti thin hle.

Bjj train duh mahse thei si lovin ka awm a. Ka priority list ah a sang lutuk lo a ni ang le kum a lo ralin ka theihnghilh chho ve ta zel a. 2016 kum tawp lamah kan in bula boxing gym chu ka zawm a. Boxing pawh chu thla khatah a to angreng khawp a, trainer chu thla 3 atan $300(~Rs 22550) ka pe thei angem tiin student discount ka dil a. Engvak a sawi lova, chu chu a remti turah ka ngai a, ka zawm ve ta a. Discount mah ni se ka tan chuan a sang rapthlak khawp mai. Thlatin sum budget ka chhut deuh reng mai. A san em avang chuan ka kal tam phah mahna tiin ka ngaihtuah a. Thla 6 vel ka kal hmanin ka hria.

University ka zir zova hna te ka han thawk tan a, hlawh ka dawnin bill pek tur ngai leh medical thil pawimawh atan ka hmang hmasa zel a, a dang zawng chu emergency fund atan ka inkhawl a. Kum 1 dawn hna ka lo thawk ve ta der mai.

First Class

kan gym a ka profile pic

Tlai khat hnabana Starbucks cafe a ka thut lai chuan ka hrechhuak leh thut a, ‘Tunah chuan thlatin membership fee pawh ka pe thei tawh ngei ang. Engati nge a hmain ka lo ngaihtuah chhuah loh zawk‘. Tichuan online ah gym zawm tur research ka ti kual a, ka thutna cafe piah lawkah chuan gym reputation nei tha ve deuh mai a awm a. Free trial class la turin ka sign up a.

Class ni ah chuan tan hmain cafe ngai bawkah ka thu a, online ah “class hmasa ber awm dan” tih video te, forums ah te ka zawng kual hrep a. Ka zam ru angreng khawp mai. Dar 6:10 velah gym ka thleng phei a, kawngka a lo inhawng sa a, ka luh dawn chuan kawngka bul chiaha dawhkana laptop hmaa lo thu Asian pa pakhat tattoo ngah deuh nen chuan ka mit a intawng a, research ka lo tih lawk tawh atangin Korean gym neitupa a ni tih ka hre nghal a.

“Engtin nge kan gym I lo hriat”

“Online reddit”

“Bjj I train duhna chhan”

A chhan han sawi mai tur ka hre lova, “UFC ka en thin a” tiin ho angreng takin ka chhang a.

Train turin “gi’ an tih thawmhnaw chu hak a ngai a, anmahni gi chu ka hawh sak a, mipa bathroomah inthlak turin ka phei a. Mi 3 vel bathroomah an lo awm a, gi chu ka ha a, mahse kekawr suih dan pawh ka thiam lo, ka bula pa pakhat, a hnungzanga cross tattoo lian deuh mai nei chu ka zawt ta ringawt a.

Training kan start dawn chuan kan Korean professor (zirtirtu an koh dan) chuan “Nervous lutuk suh aw” tiin mi rawn fiam a. Ka hmelah a hriat theih a ni ang. Ka white belt pawh suih dan ka thiam loh avangin a hmaa thawk hmeichhia chuan ama suih dan chu min hmuh a, muangchangin a tih dan entawn pahin ka suih thei ta hram a.

Class kan tan a, zirtirtu moves min kawhhmuh chu partner pakhat nena zir tur a ni a. Ka class hmasa ber a nih avangin belt level sang tawh nen min partner tir a, bathroom a pa pakhat ka biak pa tho kha niin (blue belt).

Class kan han tan chu ka rin ang a lo ni lo khawp mai a. Ka partner nen chuan inhnaih tawkin kan train a, “Heihi a tuai lo maw?” tih zawhna a rawn lang a. A “natural” lo khawp mai.

Source: wikimedia

Move pakhat kan zir chu mahni ke khai chhoh a anmahni dar chunga dah tur a ni a. Ka han tih chuan ka partner hmai chu ka nawr fuh a, a lei atangin ka khup sam pakhat chu a la chhuak a. Mak ti deuh takin “A thleng thin em ni” tiin ka zawt a, pangai deuh chuan “Thleng thin e” tiin mi chhang a. Khami ni a ka inbual fai lawk diam chu ka lawm angreng.

Class banah tradition ang tete in kan in line leh thap a, kan zavai chuan inkal pelin kan in high-five hlawm a. Locker room ah inthlak turin kan phei leh a. An fel hlawm khawp mai. Gym membership kum 1 contract ka sign nghal a (kum 1 contract a tlawm ber), gym branded gi chu ka lei nghal a ngai bawk a. Thil man neuh neuh a lo tam duh reuh khawp mai.

  • Thlatin member fee – $150 (~Rs 11275)
  • Thawmhnaw gi – $130 (~Rs 9772)
  • A dang neuh neuh – mouthguard, nogi shorts, gi 2-3 dang, etc.

Kar khatah beginner’s class chu hna banah vawi hnih ka train a, a changin zing dar 6 class chu ka zawm zeuh zeuh bawk a. Ka awmna a hlat avang chuan min 40-50 vel a ni a, zing dar 6 class nanghman turin dar 5 ah thawh a ngai a. Zing ka thawh hnu pawhin ka kal tur leh kal loh tur chu ka rilru a insual nasa thei khawp a, peih lo ru deuh chungin ka kal hram hram a, class zawhah bathroom thuthlengah chau hnawpin ka thu a. Ka kal chu ka inchhir ngai lo. Gym ah ka inbual nghal a, ka inthlak a, ka hna a hla vak tawh lova dar 7:35 – 7:40 velah chuan hnaah ka lut nghal thin a.

Hna ban class pawh chak lo deuhin ka kal a, ka kal zawh chuan inchhirna a awm ngai lo. Class banah chuan traffic jam a awm tawh lo hlauh a, mahse in ka thlen meuh chuan a tlai tawh thin em avangin chaw ei leh mut schedule chu a ti buai ve det.

Gi chu hman zawh apianga suk fai a ngaih avangin a man tlawm deuh 3 ka lei belh a, insuk a ti ziaawm deuh.

bjj gi suk fai zawh

Corona

Tichuan COVID-19 a rawn thleng chho ta a…

Gymah chuan an la ngaimawh vak lo hlawm a. Inah ka khuh zeuh zeuh tan a, gymah chuan pangai reng mah ila class thulh ka rilruk tan. Zingkar class pakhata ka training partner chu sam huh, hritlang hmel deuh hlek hnar sut deuh rengin a rawn kal a, ka ei vak lo hle. Chumi class zawhah chuan ka dar a lo na ve deuh bawk nen, virus hlau ve deuh nen chuan training ka kal tawh lova. Ka thulh atanga kar 2 hnuah sawrkarin gym khar ngai la ti lo mahse kan bjj gym neitupa chuan coronavirus chungchangah a mu tha thei lova a rilru a nuam thei lo tiin gym chu a khar ta nghal a. Email a thawn chhuah ni hi March 12, 2020 a ni.

May 11th ah gym chu mi tlemte atan an hawng leh tan a, ka rilru a la inpeih loh avang chuan ka la zawm ngam rih lo. June thlaah chuan gym pawh chu regular takin ka kal leh tan ta a. Tunah tak phei chuan kar khatah vawi 4-5 vel ka kal a, taksa a duk duhin ka sil them thum mai. Lockdown hmaa ka classmate thenkhat te ka la hmu leh lova, lockdown laiin an membership an cancel a nih loh pawhin virus an la hlauh avangin an la kal lo ni turah ka ngai.

ban duk

ENDING

Inrinni kalta khan training naah kum upa tawh pa pakhat blue belt nen kan roll (spar) a, ka ban a lock fuh a, a han pawt mar tak tak chu ka tap-out rang khawp mai. A tuk thlengin ka ban a na.

Belt zinga hniam ber white belt ka ni a. Roll changa kei aia chak lo hmel deuh te, kum upa daih tawh ten min submit hian, ‘Hmanah khan lo tan daih tawh ila ka thiam tawh viau ang‘ tiin ka ngaihtuah a, mahse han ngaihtuah thui leh deuh chuan ka sum neihin a phak ngaihna a awm lo tiin ka hre chhuak leh a. Hun liam tawh ui awmzia a awm lova, hmasawn duh chuan tunkara peih leh peih lova training kal a ni leh mai.

2 thoughts on “Diary: Brazilian Jiu-Jitsu

Leave a Reply

Your email address will not be published. Required fields are marked *