Thanksgiving

2018 khan ka biography zo mang lovin ka ziak zuai a, chumi atanga excerpt chu a ni.

————

November thlaa Thursday vawi li naah hian Thanksgiving an hmang thin a. A chhan leh vang pawh hre lovin Thanksgiving hi chu chhungte nena hun hmanna ni angin ka hre ber thin.

Thanksgiving kar hi chuan sikul pawh an chawl deuh thup hlawm thin a. A kar tluan a nih loh pawhin ni 2 ni 3 vel tal chu kan chawl thin. State danga hmun hran hrana hnathawk te pawh hi Thanksgiving hi chuan an chhungte nena hun hmang khawm tur te hian an haw thin tlangpui.

2007 kum khan ka chhungte nen Louisville, Kentucky lamah hmang turin kan kal phei a. Thanksgiving ka hman vawikhatna niin an la thupui ka ti hle.

Keini naupangte chu tihtur engmah nei lem lovin video games kan khel a, pawnah kan infiam a, ei tur tuihnai tak takte kan ei bawk a. Keini chhung bakah ka ni te, nu Lti i te chhung, leh Mizo chhungkaw dang pakhat te nen kan hmang bawk a.

Puitlingte chu an titi a, keini naupangte kan intihlim a, ropui tak takin chawhmeh an buatsaih bawk a. Saah chuan sai-ar (turkey) deuh ngei mai hi kan ei bawk a, cranberry sauce te nen. A nuam ka ti ngang mai.

Inkawm khawm leh chaw ei khawm ho hun a ni deuh ber mai. Thanksgiving kar zawhah rih belh leh infit loh sawt pawh hi fiamthu atan kan hmang thin a.

Heti hian Thanksgiving an hmang thin tih ka nu leh pate pawhin an hriat thar hnu chuan Thanksgiving laia chhungkua a awmho an dah pawimawh hle a. Heta tanga kum 2013 ah India rama an haw leh thleng hian Thanksgiving ah midang bulah kan va hmang emaw, midangin min rawn hmanpui a nih pawhin kan chhungin kan hmang hrang ngai lo.

Mizo te pawh kan khuaah tlem azawng an rawn awm tan takah chuan tum khat chu American thenkhatte chuan Mizote chu Thanksgiving zanriah va eipui tur chuan min sawm hlawm a. A va kal thei tak chu chutiangin kan tam lutuk lo.

Chawhmeh ei tur an ngah bawk a. Tlai chawei hma vel chuan an sitting room ah khualthlengtute nen chuan kan inkawm hlawm a. Mizo tamzawk te chuan English an hriatthiam hlawm loh avang chuan sap hovin thu an sawi pawh chuan engtin vak mah chuan an awm hlawm lova. Sap hote chu an thusawi a nuihzatthlak hlawm em em loh ve bawk nen chuan. A hnuah chuan an thusawi zawhah Mizo tawnga kan leh hnu chuan “tunah nuih hun” tite chuan kan han let ta vel mai mai a. Keimahni chuan kan nui ta hrep zawk a. Anni chuan an thusawi chu kan nuihpui turah an lo ngai turah kan dah ve tawp..

Khami zana kan thusawi thenkhatah chuan kan zinga mi pakhat chuan a internet wifi hmingah chuan “christianthuama777” tiin a dah a, a password ah pawh chuan “christianthuama777” ti bawk chuan a dah a. Kan nuihpui ta hrep a.

Kan chhungkua pawh kan awmhran hnu chuan Thanksgiving pawh hman ho leh a har ta hle a. Ka pawisak vak loh avang chuan keimahin ka hmang thin tlangpui.

A kum khatnaa keimaha ka hman hran tum chuan khatih hunlaia ka inchenna piaha gym ah chuan ka kal thin a. Gym fianrial deuh hlek niin a bulah chuan insukna dawr a awm bawk a. Zingah hna ka thawk a, chawhnuah ah class kalin class zawhah chuan gym ah chuan ka kal thin a. Hetih lai hian high school a ka thian kawm thinte chu college hran hranah state dangah te an awm deuh thup hlawm a. Hmelhriat tam tak pawh nei mah ila mahnia awm ka thlang thin deuh ber.

Thanksgiving chawlh a rawn thleng a, hmelhriat leh thian kawm tur thenkhat nei mah ila ka khua a har thei hle. Midang hnenah ka inhawng ngai lo va, ka thinlunga harsatna awm pawhin ka sawichhuak ngai lo.

Kum 21 bawr vel ka ni a, ka hmel pawh a tha chho tan. Ka incheina leh ka awmdanah pawh mi confident tak mi nih ka tum chho a, fakna pawh ka tawng chho ve nasa tan hle. Chuti ni mahse, heng zozai hi awm mahse ka rilruah chuan lungawi lohna a awm tlat a. Hlauhna tam tak ka nei a, ngaihzawng nula hmeltha tak neih ka duh a. Pawnlama hmel lamah chuan confi ve hmel tak pangai tak ni hmel mah ila chhunglamah chuan hlauhna tam tak ka nei a. Ka lo seilen pui, ka rilrua keimah ka inngaihdan leh ka khawvel lo thlir thin danin ka rilru a tikhawlo ti ila a dik ber ang chu.

Thanksgiving niah chuan gym ah kal turin ka inthlak a, hemi ni atana ka lo lei lawk tawh Jack Daniel whiskey chu kengin gym ah chuan ka inkhalh phei a. Motor parking na hmun dawra hnathawkte motor tih loh chuan a ruak vek a, ka zu um chu ka phawrh chhuak a, motor chhungah chuan keimahni ka in teuh a, gym chhungah chuan work out turin ka va lut ta a.

Rui tawkin ka va lut a, a hmaa hnathawk bak a lo awm lo. Gym bangah chuan darthlalang tam tak a awm thleh thluah hlawm a, ka workout pah chuan ka inen ziah thin a. Hemi tum pawh hian ka inen leh tho a. Ka inen chuan ka inhmu a, tlangval hmeltha ve pangai tak, hrilhhai tak, duh tam tak nei, mahse chhunglama hlau (insecure) takin ka inhmu.