sticky notes

sticky notes

“Second 30 chhungin ka knockout ang che” tiin follower 8 nei account chuan UFC champion thlalakah chuan a va comment a.

Mixed martial arts (MMA) zirtirtu John Danaher an kawmna video ka en a. A zirtirte thenkhat social media a an chet dan chungchang an zawh chuan, “Mi kan gym ah an rawn kal a, khawvela champion la ni tur an nih thu min hrilh thin a. Ka nui mai mai thin. Rei hmuh tur an awm ngai lo. Tawng thu ni lovin a taka min hmuh a ngai. Ka zirtirte thenkhat hi social media ah chapo takin lo tawng pawh nise, miin training turin nitin darkar tam, mel tam an rawn khalh tang tang peih a nih chuan ka lam atang chuan ka lo zirtir peih. An thusawi ni lovin an thiltih atangin an inpek zia a hmuh theih” tiin a chhang a (paraphrased).

Action speaks louder than words. Tawng thu chu a tlawm em a, online khawvela kan hmuh ang hian engmah lo mai ang a ni. Tawng thuaa sawi chhuah chu thei lo kan awm lo.

Online a miin aw an neih theuh avanga buaithlak pakhat chu, mi zawng zawngin aw an nei. Nang, kei, kan thenawmte, mi fing vak lova kan hriat mi pawh kha.

text message app icon

Tawng a sawi aiin a taka hmuh erawh chu hnathawh tak tak a ngai thung. An inang lo hle. Miin thil an sawi aiin a taka hmuh theih tarlan chu a man a hlu daih zawk.

Entirna thenkhat:

Fate enkawlna

Nu leh pain fate an zilh hauin faten nu leh pa thusawi aiin an thiltih, an nundanin thawm a ring zawkin an entawn zawk thin. Kan thiltihin kan thusawi aiin thu a sawi ring zawk thin a ni.

Programming

Sawi aiin I project I hmuh theih chuan a hlu zawk. I thilsiam chu hmuh theihin a awm em, I app hmang an awm em? khawnge I thil siam tawh portfolio. etc.

Mi lar thil dil

Mi lar, buai leh hun nei lo, thil dil dawnin I thil tih chu I hmuh theih chuan an tanpui duh zawk ang che. Midang tam takin (a tam zawk chu engmah ti lo tur ho) thil an dil fo thin hriat a tha.

ex: “Podcast ka tan dawn a, rawn lang ve la” VS “Podcast kartin ka chhuah ziah a, episode 100 na a special guest atan I rawn tel thei em”

Mi buai dinhmunah indah ta la – Hun I nei lova, tih tur pawimawh I nei teuh. A tu a zawk hi nge I puih duh zawk ang.

Keimah ka insawina ni lovin, online sphere ah ka awmna a rei ve tawh a. Heta tanga ka thil hmuh pakhat a ni.

Podcast tih vel a lar tawh em avangin mi lar deuh tawh interview an duh thup hlawm a. Mahse I thil tih tawh I hmuh theih chuan midang aiin I chance a tha zawk ang.

Entirna dang leh,

“Hemi hi min lo pui” tih ai chuan “Heihi ka bei hrep tawh a. Hemi x,y,z hi tih ka tum tawh a mahse ka la hlawhtlin thei lo, min pui thei angem”. Tunge puih an duh zawk ang?


Mi tam zawk hi chu “Engtikah emaw chuan” tih khawvelah kan cheng a. “Engtikah emaw chuan ka la ti ang”, “Engtikah emaw chuan (engpawh ni rawh se)”  tiin midang kan hrilh kual a. Thawk miah lovin, tha leh zung seng miah lovin kan sawi chhuak a. Sawi mai ai chuan a taka kan hmuh theih, kan hnathawh leh kan thusawi a tak a ni tih kan hmuh theih chu a hlu zawk a, he kan khawvel mi thusawi a tak a nih leh a nih loh pawh kan hriat hleihtheih lohnaah hian a la hlu zual zel ang.

One thought on “Hrilh Lovin Hmuh Rawh

Leave a Reply

Your email address will not be published. Required fields are marked *