Kristian Ten Tawrhna Kan Mamawh Chhan

Note: He article hi kan kohhran Silver Jubilee lawmna a hmanhmawh taka ka article submit.

Harsatna leh buaina awm lo nun kan duh theuh awm e. Natna tel lova nawm zawnna khawvelah kan cheng ti ila a sual lovang.

Tunlaia kan khawsak dan chu a nuam tawh lutuk a hna pawh kan thawk tha peih tawh lo angin a lang thin. Kan nat hlekin damdawiin kan pan nghal a, kan mamawh piah lamah lirthei leh bungrua kan inneih tam siak a, kan nuna nuam lai midang lo awh turin online-ah kan pholang a, ei leh inah pawh kan hnianghnar hle. Amaherawhchu kan nun a lo nawm a, a lo awlsam a, harsatna pawh kan neih mang loh chuan Pathian kan theihnghilh ta thin a ni.

Tunlai khawvel thiamna a lo sang zela mihring te hi kan indah sang ta hle mai a. Pathian a awm ring lo te, nawmsip bawla mahni duh duh dana nung te kan lo ni ta hlawm a. Thiamna sang te, science leh technology sang te hi finna tak emaw tiin kan lo hresual ta a ni. Mihring finna hian a hriatphak loh thil a tam si a.

Hetianga nawmna zawnga hringnun kan hman lai hian kan nun atanga kan theihnghilh thin chu tawrhna kan mamawh tih hi a ni.

Engvangin nge tawrhna kan mamawh kan tih chuan – kan harsat leh buai chauhin Pathian kan auh thin avangin Pathian kan theihnghilh loh nan te. Mihring ve mai kan ni a, kan thil tihtheih a tlem hle tih kan hriat renga kan chapo lohnan te. Harsatna hi chu kan damchhunga kan hmachhawn tur, min tichaktu leh min tipuitlingtu anni tih kan hriat rengnan te tawrhna hi kan mamawh a ni.

Sermon pakhat ka ngaihthlakah chuan pastor in chhungkaw pakhat chanchin a sawi a, “An chhungkua an tluang em em a. An in leh lo a tha a, sum leh paiah harsatna an nei lova, an fate lah ni se an tha em em vek a. Chhungkaw nu ber chu a mangang ta a, tichuan thingthiin Pathian hnenah, ‘Eng vangin nge min kalsan?’ tiin a tap ta a”.

Kan nunah harsatna a lo thlenin beidawng mai lovin Pathianin kan tawrhna te hi min phalsak a, kan zawh bak loh kross chu min put tir ngai lo tih i hre thar leh ang u. Sap thufing pakhat chuan “Tawrhnain lunghlu a siam thin” tiin a sawi a, a dik hlein ka hria. Kan chhungrila kan thiamnate, kan talent leh kan tangkainate rawn lang chhuak turin kan tawrh a tul thin.

Kan kohhran pawh hi kan hmaa lo kal tawhte, a bul lo tantu te khan harsatna tam tak an lo paltlang ngei ang. Amaherawhchu an harsatna karah pawh Pathianin a hruai zel a, tun kumah Silver Jubilee hlim leh lawm takin kan lawm theih phah ta a ni.

Kei chu ka hma lamah tawrhna ka hmabak tih ka hria a. Vui lova huaisen taka keima thatna tur zawk a ni tia ka hmachhawn theihna turin Pathianin chakna min pe se tih hi ka dilna a ni.