Online a Chawhmeh Lei That leh That Lohna

instacart grroceries
Ka thil lei hnuhnung ber

Online a bungrua lei chu ngaiah kan nei tawh a, online a chawhmeh lei erawh chu a la tharin a hmang thin pawh an la tam lo hle. America ramah pawh I awmna address ah an rawn dah (deliver) theih leh theih loh endik phawt a ngai thin.

Online ah chawhmeh a lei theih tih ka hriat tirhin a mak ka tih mai bakah a tul lo hialin ka hre thin.

Chawhmeh ka leiin a remchang apiang ka lei ngawt lova, uluk deuha thlan ngaih chang te a awm thin. Miin min bazaar sak se an pawisa anih loh avangin keimah angin an uluk angem? Thlai hring tha leh chhia an thliar hrang thiam angem?

2020 coronavirus pandemic a rawn thlen takah chuan online grocery shopping chu hmang an tam phah ta hle a. Discount hran hran a lo awm ve bawk nen keipawh ka chhin ve ta a.

Online a chawhmeh lei theihna service chi hran hran a awm a, a lar leh lian ber pawl instacart (ka hman thin) thawh dan tlangpui.

  1. I dawr thlan atangin thil I order.
  2. I thil order chu dawr atanga va lei turin mi (driver) an va kal.
  3. I inah an rawn dah.

Sawifiahna  – Hetah chuan ei leh in mai bakah bazaarna hmun supermarket chhunga thil lei theih hi groceries kan ti mai a. Mizo tawnga translation awlsam ka hriat mai loh avangin chawhmeh tiin ka rawn hmang ang. Ei leh in theih thil ho sawina atan “chawhmeh” hi ka hmang.

organic coconut juice
Organic coconut water

Online a chawhmeh lei thatna

  1. Bazaar hun kan save. Dawra kal leh haw hun chhung, dawr chhunga thil zawn kual chhung, a man pe tura innghah chhung.
  2. Khawi atang pawhin kan bazaar thei. Computer emaw phone ka hman theihna hmun atangin ka bazaar thei.
  3. Dawr tamtakah kan bazaar thei. Dawr thenkhat, wholesale hmun te chu membership neih ngai te a awm a. Online service I hman nen inzawmna an neih chuan member ni lovin a bazaar theih.
  4. Kan duh chiah chiah lei theihna. Dawr chhunga phar kual ngai lovin kan duh chiah chiah kan zawng kual thei a, chutiang bawkin dawr chhunga kan mamawh loh mahse kan awh deuh kan hmuh thut avanga kan lei leh ringawt ang kha kan pumpelh thei.
  5. A rawn thleng rang a, a inhawng reng. Ka order atanga darkar 1:30 – 2 hnu velah a rawn thleng tlangpui. Zana order chuan a tukah. Dawr tak ang lovin inkhar hun a nei lova kan hman hun hunah kan lo bazaar lawk thei.
Whey protein – strawberry banana flavor

Online a chawhmeh lei that lohna

  1. Mi a ti thatchhia. Bazaar hun kan hlep a mahse mi tam zawk chu thil pawimawh lo tiin hun kan khawhral tho tho avangin mahniin va bazaar ta ila kan hlawk zawk ang. Bazaara ke a kal kual, midang hmuh ve hrim hrim te pawh hi mihring tan chuan bazaar piah lamah a thatna a awm.
  2. Chawhmeh man a to zawk. Dawra kal aiin chawhmeh hi tlemin an ti to zawk tlangpui (a dawra zirin).
  3. Fee dang neuh neuh pek a ngai. Service fee, delivery fee, driver tip man (tip pek kher chu a ngai lo), etc. Delivery fee a thlawna neih duh chuan membership fee te a awm leh, etc.
  4. Mihring dang kan hlat. Mahni in, mahni room uap chhuahsan lovin kan inkhung reng phah.
  5. Kan mamawh loh lei a awl. A chunga a thatna a ka tarlang ang khian, kan mamawh chiah kan hriata mahni kan inthunun thei a nih chuan thlemna kan pumpelh thei. Amaherawhchu mamawh chiah ni lo lei a awl veleh em em thung. Kan mamawh thil “cart” ah han dah ila, “midangin hemi ang hi an lei” emaw “hemi thil nena inhmeh deuh” an rawn tarlang ho hi lei lawk tum miah loh pawhin lei tel ve mai a awl hle.

Online ah chawhmeh leiin vawi 3 ka bazaar tawh a, ka shopping experience chu a la tha vek ti ila a sual lovang.

  • Thlai hring engmah ka la lei lo.
  • A man a to chak duh hle. Vawikhat order-ah $100-150 vel ka hmang tlangpui (tip man telhin).
  • Supplements (vitamin D, fish oil, whey protein etc) vel chu Amazon atangin ka chah thin.

Delivery service atana ka hman thin instacart thil tih theih thenkhat

  1. I order va lam tu (driver) nen a in message, call theih.
  2. I thil order dawrah a lo awm tawh loh takin a dang thlak tur a thlan lawk theih. Va order tu in a rawn message thei bawk. ex. Chicken breast a awm tawh loh chuan chicken tenders.
  3. App chhunga map atangin khawiah nge driver a awm a, enge a tih mek a hmuh theih.
  4. App atang emaw a takah pawisa-in (cash) tip a pek theih. Driver ho chuan app ni lovin cash a pek an duh tlangpui.
  5. I thil ho chu nangmah mihringa rawn pek kherin emaw I kawngka hmaa dah turin thlan tur a awm.
  6. I order an rawn dah zawhah enge I shopping experience tiin driver ho rating a pek theih.

Kar hmasaa ka order khan delivery fee a awm a, “membership free trial” (kar 2 chhung) I lak chuan a thlawnin an rawn deliver thei an tih avangin free trial chu ka la ta a. Membership man chu kum tin $99 (~ Rs 7270) a ni a, kar 2 hmaa ka cancel loh chuan ka bank ah amahin a renew ang an ti bawk a.  Thla tin zawnga chhut chuan $10 pawh a ni lova, a man ve viau lo maw tiin ka ngaihtuah a. Mahse ka ngaihtuah chiang leh a, tunah chuan ka mamawh rih lo e. Kar 1 a liam tawh a, min rawn charge leh hmain ka cancel theihnghilh loh ka beisei.

2 thoughts on “Online a Chawhmeh Lei That leh That Lohna

  1. Mizoram emaw north east India tana online shopping platform tha deuh hi rawn din ve mai la. Mizoram in hma a sawn na tur ava ni dawn em.. Products hrang hrang Kim taka an hmuh theihna tur te han ti duah ila. 😂

Leave a Reply

Your email address will not be published. Required fields are marked *