2015 kum a ni a. Ka Associate’s Degree (Bachelor’s hnuai) beiin college ka kal mek a. Associate’s zawh hnaih tawh lam a ni.
Ka degree tana ka class mamawh pakhat Physics 2 class ka la a, lecture leh lab – class hran ve ve, mahse inkawp tho si.
A hmain Physics hi ka lo la sual tawh a, ka degree tana mamawh miah loh nursing degree hoin an lak thin a lo nia. Class manah sum leh hun ka seng thlawn a nih chu.
Class ka lak sual chhan pawh school advisor, kan class lak tur min hrilh tu ka hmuh duh loh vang. Tum khat ka va hmu tawh a, vai nu hi a lo nia. I tan a ngai tia min lo zilh hrep chu ka ei vak lo.
Zep lovah chuan a sawi chu a dik reng, amaheraehchu khatih hunlai khan lehkhazir ka rilruah a lang lo ve em a ni.
Physics hi ka man lo laklawh ti ila a sual lovang. Lecture class chu ka pass ve thei mai, mahse lab hi ka man lo lehzual. A hmaa ka class lak sual pawh kha lab class ah group ah min then hrang a. Kan groupah mi 3 – kei, vietnamese pa pakhat leh keini aia upa deuh hlek midum pakhat. Midum pa hi a tuai deuh reuh a min be tha viau a, chu chu hmang tangkaiin class ah a homework ka copy sak nual.
Physics 2 lecture pawh chu pangai takin ka ti chho zel, lab erawh ka ngaihtuahawm khawp mai. Lab class pangai chu lab partners te hmangin thei ve mah ila final exam a la awm dawn a, ka pass ngei ngei a ngai. Lecture pass mahse lab pass lo chu fail a ni.
May thla a lo ni a, final exam hun a hnai chho. Kan lab zirtirtupa chu sap putar, nelawm vak loh, aw chher chhe ve deuh mai hi a ni a. Exam dawn zanah chuan mangang em em chungin ka zir nasa mai. Tih that tum pawh ni lo pass ve hrim hrim tumin. Mu mumal lovin a tuk zingah chuan ka tho a. Class ka kal chuan ka huphurh ngang mai. Tawngtaina nen ka bei nasa.
Class ka thlen chuan boruak chu a tawt khawp mai. Ka thutnaah thuin eng tak rawn chhuak ang maw tiin ka ngui. Exam dar a ri, zirtirtu a rawn la thleng lo. Minute 5 a liam, a rawn la kal chuang lo. Minute 10. Keini ho chuan engatinge ni tiin kan sawi sap sap. Hun a liam zel, a rawn kal dawn lo aniang a tiin beiseina tharin ka khat. A rawn thlen meuh chuan a tlai ta khawp mai, a ni chu zing thawh a lo hai chu niin. Inthiamlo takin final exam chu nei lovin a hmaa kan lab results ho chawhrualin min grade dawn ta zawk tiin a puang. Ka thinlung lawmnain a khat.
Kha putar thawh tlai azarah Physics pawh chu tluang takin ka pass ve thei ta a. Ka Associate’s Degree pawh chu zoin, kum 3 hnuah ka Bachelor’s computer science degree pawh ka hmu chhunzawm a. Khami ni kha thawh hai lo se tluang takin ka zo bik kher lo maithei a ni.