Ro Khawl Khawm

people walking in the city streets

Coronavirus pandemic a rawn thlen thut chinah hna chan leh hna nei lo (maktaduai 36 chuang) an awm a, mimal sumdawnna sawrkawrin a khar sak, hawn an phal leh huna dam khawchhuak zo lo tur an awm nual bawk a.

Ei in man, in luah man pek harsa an thahnem. Inkhawl lawk (savings) neih a pawimawh zia a lang a. A hmaa thla 3 – 6 emergency savings neih a tha ti hnen atangin tunah chuan kum 1 savings neih a him tih ziak ka chhiar fo mai. 

Quarantine lockdown khirh tak kan nei a. Hna nei lo tih tur nei lo an tam phah. Ni 60 chuang hnuah lockdown muangchangin an hlip chho tan tihah tual thahna video rapthlak tak a rawn chhuak hlawm a. Mipui an thinurin an lungni lo hle. Vun rawng, a dik leh dik lo lam dahthat hnuah pawh tual thahna rapthlak, rilru khawih tak mai a ni.

Feet 6 a inhlat tur tiin “Social Distancing” dan chhuah mahse zawm meuh lovin protest kan nei leh ta a. Social distancing chu khawilam. Peaceful protest neih tum kha a tak a rawn thlen chuan a peaceful lo hle thung. Ram chhung khawpui hran hranah intualvuakna (riot) pui tak a chhuak a. Dawr, sumdawnna, office, a bik takin khawchhung downtown a awm ho chu tihchhiat an ni nual. Nunna chan sawi tur an la awm belh zel bawk.

finger pointing at treasure map

Ka savings neih sa hi thla 2-3 vela pawh sei ka lo ruahman lawk a. Amaherawhchu tun hnaia thil thleng atanga kan hmuh theih ang hian thawklehkhata bo vek thei a ni. Kan rosum khawl khawm sa, bungraw thaa kan ngaih te hi awh chin rei lo, ruk bo leh suam vek theih an ni.

“Leiah, thîm leh tuiêkin a ei chhiatnaah, rûkruten an reh pawha an rûknaah hian in tân ro khâwl khâwm suh u. Vânah, thîm leh tuiêkin a ei chhiat lohnaah, rûkruten an reh pawha an rûk hek lohnaah chuan in tân ro khâwl khâwm zâwk rawh u.In ro awmna apiangah in rilru pawh a awm ṭhin hi.
– Matt 6: 19-21

Leia thil kan khawl khawm laiin vana ro khawl khawm theihnghilh a awl hle.

Nizan ka mut hma leh tukin zing ka thawhin riot avangin khawpui hran hranah buaina a la tam hle a. Dawr man to tak takte tihchhiat niin a chhunga thil hlu (thawmhnaw, jewelry, TV, etc) te chu nasa taka suasam an ni. Rinna (faith) neih loh chuan heng video hmuh te hian beiseina sang neih a har hle.

Mipui tam tak insual buan buan, inrawlhna nei ve lo pawi sawi lo tihnat, mahni dawr lo veng mai maite sawisak video hmuh te hian a thlaphang lek lek theih. Kan history ah chuan indona leh inthahna tam tak a thleng a. La rei lo hle mahse kan generation chuan kan hre phak lo a, hmanlai thawnthu ang mai a ngaiin kan theihnghilh zo ta. Ka hmalam ka ngaihtuaha ka duan lawk hian he leiah chiah ni lovin vanah pawh ro khawl khawm ka theihnghilh loh ka beisei.

2 thoughts on “Ro Khawl Khawm

Leave a Reply

Your email address will not be published. Required fields are marked *