girl holding candies inside store
Photo by frankie cordoba on Unsplash

Zirtawp zan gym ka kal zawhah supermarket ah bazaar turin ka kal thin a.

Weekend a hnaih tawh avangin ka ni hman dan pangai atangin ka inthlah dul deuh a, chaw ei mumal lovin gym ka kal tlangpui. Zan dar 8 a pelh hnua dawr ka thlen meuh chuan ril a tam tawh thin hle.

Dawr ka thlenin shopping cart ka nawr a, thei leh thlai awmna tlar atangin ka bazaar tan a. Ei leh in tur tuihnai leh tuihmel ka hmuh chu insum miah lovin cart ah ka dah lut pawp pawp a.

Dawr chhunga kal dan pangai ka nei tawh a, ka bazaar zawh dawn lampangah chhang thlum deuh deuh awmna ka pel thin a. Riltam tawh nen a zavaia lak vek mai a chakawm thin. Tam deuh lei laka mi daltu chu cart a khah tawh vang (haw huna thiar a peihawm loh).

Heng cake leh chithlum te hi an tuihmel thei em em mai a. A rawng leh frosting, a hming, a bawm chhunga an rem dan thlengin ril a ti tam thei.

Ka tan a hrisel lo tih hre mah ila riltam lai chuan a hnar bik mai theih loh thin.

In ka thlen hnua phur taka ka han ei chuan a hmel ang lovin tui ka ti khat khawp mai. Ka bazaar apiang deuh thawin a dang dang ka lei thin a, hemi hi chu tui ka ti mahna tiin a chi dang deuh ka lei kual vel a. Ka hlawhchham zing tawh hle.

Ka apartment chhungah chhang chi hran 3 ei zawh loh ka la kawl.

red sweets pastry
Strawberry and coconut jelly roll

Nun tehkhin thu mi hriatchhuah tir a.

Kan thil it leh duh kan neihin kan rin ang a lo ni lo thin. Hlimna min thlen tura kan ngaih laiin hlimna tak thlen thei tu a ni lo. A chang chuan kan tana thil tha lo a lo ni hial bawk thin.

Entirnan thawmhnaw thar lei. Thawmhnaw thar kan it deuh mai kan neihin kan hlimna chu rei lo te, thawmhnawin a thar nihna feeling pawh a awh rei lo hle. Mahse a dang kan awt leh a. Lei turin enge kan pek a ngaih – hun, sum, awhzawng lei mai chin (habit), kan inchhunga hmun.

Ka naupan laiin thawmhnaw thar ka neih chuan ka hlim phah viau ka ring thin a. Thawmhnaw thar neih ni chuan sikul kal pawh a tichakawm ve deuh thin. Mahse awmzia tak a lo nei si lova, chhungrila keimahni min thlak phah lo. High school a kei aia hausa ka thiante pheikhawk tet pheng phung bun ka hmuhin, ka thawmhnaw hlui chu ka la hmang chhunzawm thei hrim hrim tiin ka ngaihtuah let leh fo. Thawmhnaw chhe thei, hlimna der.

Thawmhnaw chauh ni lovin a aia ril zawkah pawh a rawn inlar thin.

Insum zawh loh laia kan thiltihin a hnua kan hriat lawk loh thuihruai a nei a. Kan chakna tilungawi tura hma kan lakin chawplehchilh takin nawmna thlen mahse a hnuah inchhirna a thlen chawk.

2 thoughts on “Chithlum Nun

Leave a Reply to Emmanuel Hmar Cancel reply

Your email address will not be published. Required fields are marked *