Diary: Zawhte No Lawmawm πŸ˜ƒ

Kan in message na history chu screenshot a la a, thian atangin min remove nghal bawk a.

Social media atanga ka chawlhna thla engemaw zat a ni tawh a. Instagram ka hmang tawh lova, kohhran thiltih avangin loh theih lovin facebook (fb) ka la hmang a, snapchat phei chu a kum tel ka hmang tawh lo.

Ka thiante zingah snapchat hmang an la awm em tih pawh ka hre lo. Business lama ka chhiar thin pa pakhat chuan snapchat-ah ka post thin a tih avangin ka download tha leh a. Hman lohna a rei tawh bawk a, a hman dan pawh ka lo theihnghilh hman.

Social media dang ngaihtuah chuan a reh vawng vawng khawp mai. Ka thian list atanga story en tur pawh 2 bak a lo awm meuh lo – ka thianpa Indianapolis a awm leh hmeichhe pakhat state danga mi.

Gym a ka awm lai chuan thla ka la a, “Kum tam hnua ka snap hmasa ber” tiin ka snap story ah ka dah a. Darkar 24 hnua view zat = 8.

A hmaa hmang thin ho, ka story en thin ho pawh hmun dangah an pem zo ta.

Ni 2-3 vel hnuah mi 3 atangin story thar en tur a awm a – ka en hlawm a ho te te in ka comment vek a.

Chung zinga pakhat chu a hmaa hmeichhia tho kha. State danga mi a ni a, a u mipa nen football kan khel tlang tawh a, a hmelchhe lem lo ka ti. Social media ah ka hmuh lohna a rei tawh hle a, a takah phei chuan ka hmuh lohna a rei tawh lehzual. Hmanah fb ah ka hmu zeuh zeuh thin a, ka awmna state a mi bialpa a nei chho a, chumi hnu chuan fb ka hmang ngai tawh mang lova. Nikum nge kum hmasa khan a bialpa nen an inthen thu ka thianpa sawi ka hre thawi a, chumi hnu chuan a khat tawka fb ka luh changa ka hmuh thin pawh kha ka hmuh ngai tawh loh avangin account a delete turah ka ngai a.

Tichuan rei tak ka hmuh tawh loh hnuah snapchat la hmang tlemte zinga mi a lo ni hlauh a, ka story en mi 8 zinga mi a ni nghe nghe. A story ah chuan zawhte no camera hnaih tawkin thla a lak pui a, “zawhte no lawmawm πŸ˜ƒ” tiin ka va comment (English in). A hnu reiloteah chuan kum tam hnua ka story pahnihna atan ka lubuk deuh thlalak ka dah bawk a. Khua a rawn tlai chho a, he nula hian screenshot a lak thu snapchat notification ka dawng a. Ka lubuk thlalak en zinga mi a nih avangin khami screenshot ni turah ka ngai a, a tlai tawh avang chuan ka mut san a.

Lubuk snap

A tuk chhun hnathawh break laiin app chu ka check a. Screenshot a lak chu kan inbiakna message history a lo ni a. Inbiakna history kan nei tih pawh ka lo hre tawh lo. Ka han scroll chhoh chuan a hmaa kan inbiakna message tlem save sa ka lo nei a, kum li kalta Thitin thla (Sept) 2016 a mi daih tawh. An nawi hlawm lutuk a screenshot lak tlak pawh an ni lo. Ani erawh chuan screenshot lak tlak message a lo nei pawh a ni maithei. Mak tih hmel deuh tur emoji ka va thawn chuan message chu a thawn thei mai ta lova,Β “thiana a add che a ngai”Β a lo inti a. Kan inbiakna message chu screenshot ka la ve a (lak tlak engmah awm lo), chu chuan notification a va thawn ve a nih ka ring. Chumi hnu chuan a profile a hmeichhe lem ka hmuh theih thin pawh ka hmu thei tawh lo.

Thian atangin min remove a nih ka ring a, enge a chhan erawh ka hre hauh lo. Zawhte lawmawm va tih thu avang chuan a ni thei ngawtin ka hre lo. A rukin a chhan ka hre chak hle. Ka han dawn kir a, Ngawi teh, fb ah ka hmu ngai tawh lo a account a delete a niang ka tih te kha min block vang a ni hrim hrim  tiin ka ngaihtuah chhuak a. 🀣🀣🀣. Ka thian pakhat nen an inhmelhriat ve deuh avangin, an inkarah thil a thleng anga amah nen kan inkawmngeih si a min block ve phah a ni ngei ngei ang, tiin ka thianpa chu ka va message nghal a,

“Chumi chuan a block che em” ka va tih chuan

“Fb ah chuan min block lo” tiin mi chhang a (fb a la hmang tih a nemnghet bawk).

Zawhna a titam lehzual. Anih chuan engati nge kei?

“Hmanah ka va bia ang a ka hre tawh lo a ni ang”

“Hahaha”

A ngaihna ka hre lo, hrilh ka hai ngei mai. A chhan leh vang a neih ve ngei chu ka ring ve bawk si.

Mahse… a la tawp lo. Zanah fb ka hawn a ka hmuh hmasak ber – a profile thlalak thar a lo dah. Enge a awmzia ka hre lo lehpek. Ka thianpa hnenah min block tawh loh thu ka va hrilh leh a. Ani lah chuan uangthuang takin, “A star che va be rawh” mi lo ti.

Weekend a rawn ni chho a, inrin zanah chuan fb atangin,

“Snapchat ah min delete em ni” tiin ka va message a.

“Ka ti maw? I pawisak ka lo ring lova” tiin hre lo ni awm deuh hlek posi in a rawn chhang a.

Ka chhan hmain ka inbual hmasa te te a. Ka inbual zawh chuan muangchangin thawmhnaw ka inbel a, ka tih tur te ka ti hmasa a.

“Pawisa e. Zawhte no kha a lawmawm hle mai”.

Tun thlengin min block chhan leh vang ka la hre lo. Ama lam atang chuan a chhan chu a nei ngei turah ka ngai. Ka va message pawh mi rawn chhang let leh tawh a, amaherawhchu kan inbe chhunzawm zel ang tih chu ka sawi thei lo. Min block chhan chu engtikah emaw chuan ka la hre mahna. Hre lo mahna.

3 thoughts on “Diary: Zawhte No Lawmawm πŸ˜ƒ

Leave a Reply to Zorama Cancel reply

Your email address will not be published. Required fields are marked *