coffee and paper

Darkar tam senga I thil ziah ho kha tumahin, emaw mi tlemte chiahin chhiar dawn se I la ziak chhunzawm zel peih angem?

Tunlaiah website, blog siam chhan infuihna lian bera ka hmuh chu sum siam tum vang a ni.

Kum 10-15 vel kalta khan blog a thil ziah share kha a lar thei khawp a. Tunlaiah (ka ziah lai hian 2020) chuan blog ngaihsakna hun kan nei tawh lo a ni ber mai. Blog a thu ziah duah aiin social media lama thlalak post, thu tawi te te post kan uar ta zawk a. Thlalak pakhat post tur ringawtin filter, angle, lighting, etc tha lai ber lak tumin hun rei tak kan hmang tho bawk si. Social media lama thu sei deuh post ho pawh hi a chhiar chhuak peih an tlem telh telh ka ring.

Hun a lo reiin blog neih chhan pawh a lo danglam chho ve zel a. Mahni thil ziah share na hmun a nih thin laiin tunah chuan Search Engine Optimization (SEO) hmanga sum siam tum vang a lo ni ta a. Posts leh articles pawh research beih hnua Google in a dah san tura ziah an ni a. Chutih rualin sum siam tum ringawt ho chu an daih rei lo thin hle. Kawng tawi, hlawkna ringawt kawng an zawh avangin hlawkna an hmuh mai lovin an bansan thin. Blog hmanga sum tam tham la lut ho chuan hlawkna an hmuh hmain kum tel engmah hlawkna awm lovin an thawk hmasa thin.

A hmaa mahni blog nei thin ho pawh a tam zawk chuan social media lamah an pem san ti ila a sual lovang. Blog a thu ziah chu social media ang lovin ngaihtuahna hman a ngai a, ngun taka thu ziakin darkar tam hun hman a ngai fo thin. Midangin hun engzah nge an hman chiah ka hre lova, ka hriata chu mi pangai aiin blog post pakhat ziak turin hun ka duh rei. Thu sei vak lo post tur pawhin a tlem berah darkar 1-2 tal ka mamawh thin.

Blog ziak peih kan tlem rualin a chhiartu lam pawh an tlem telh telh. Tunlaiah chuan article pum chhiar lovin a headline chiah a ni kan chhiar tawh ni.

Blog ka ziahna chhan

reading and writing at coffee shop

Thu ziah pawh nuam ti hranpa lovah chuan engati nge kei ka ziah. Chhiar an awm pawhin mi tlemte chiah hmuh tur, hlawkna hmuh tur mai awm si lovah hian eng vangin nge darkar tam ka seng.

Blog ziah hmasawnna:

  • Ngaihtuah leh sawi fiah. Rilru leh ngaihtuahnaa awm idea chu hmuh leh chhiar theiha ziak chhuak turin ngaihtuahna a ngai a. Awmzia awm turin fiah taka sawi a ngai bawk.
  • Tawngkam zir. Thil ka ziah apiangin hemi hi ziah zawm tur a nih leh nih loh, English tawnga ka hriat Mizo tawnga ka hriat mai loh tawngkam a awm ngei ngei.
  • Journal leh history. Social media a post tawi te te ho chu hun a lo reia han chhiar pawhin engtin vakin kan awm lova, kan account a bo chuan a bo ve nghal chu a ni mai bawk a. Blog post ngun taka kan ziah erawh hi chu han chhiar let hian chhungrila a thawh dan a dang.
  • Hun hmanna tha. Phone leh internet a hun khawhral ai chuan a let tam takin hun hmanna tha zawk a ni.

A tawpah chuan midangin chhiar dawn lo mahse mahni atana ziah ve hrim hrim. “Fa chu nei ila an puiltling kawnga pui thei tur lehkhabu ziah ka duh ngei ang” tiin tunlai chu ka ngaihtuah chhuak a. Mahse chumi hma chuan mahni puitling ve phawt a ngai dawn a nih hi.

7 thoughts on “Blog Ziah Awmzia A Awm Em?

  1. Reading your blog and seeing your videos is interesting and inspiring.. Most youngsters never think like you; people leave the little things and go for the better and updated. But for me, it makes me want to write something too..
    Keep up, i will keep reading them.💪

Leave a Reply to A Cancel reply

Your email address will not be published. Required fields are marked *