Diary: Independence Day Weekend

July 4th Weekend, Independence Day – kum dang ang lovin tun kum chu a dan a dang deuh hlek. Race chungchangah tension a la sang a, ramchhung politics ah buaina a la tam hle.

Zirtawpni

Zirtawp tlai chuan ka motor tire ka pump pahin “ka rawn riak dawn” tiin ka thianpa ka va phone a. Ka motor hmalam tire pahnih hi tunlai chu a thep reng mai, kar tin deuhthaw pump a ngai a, a ninawm tan hle.

Ka chhuah hmain ka inbual leh hnuhnawh a, ka thianpa hnen atangin miscall leh “ka lo nghak che a nia” tih message ka dawng hman. An in ka va thlen chuan inhmuh lohna a rei tawh em avangin amah leh a roommate (ka thianpa tho) chu ka chibai hial a. Kan titi a, hla kan ngaithla a, chaw kan ei bawk a. Zing dar 3 thleng.

Inrinni

Chhunah ka motor tire kan check a. Muangchanga car ka tawlh hret hret lai chuan motor tire chu a lo enfiah a. Tire-ah chuan perek a lo bur va mai a. A lehlamah pawh chuti tho…

Tlai lamah tire patch kan vuah a, perek chu a lo lut thuk khawp mai. Ka pump zin a lo ngai lo zawk ngawt alawm…

Zanah sanpiau leh ar thla (chicken wings) kan ei a. Sanpiau chu kawl tawng a nih thu leh a lam dan dik min hrilh a (ka theihnghilh leh tawh). Riak turin min sawm mahse tihtur ka la neih avangin ka haw phei a. In ka thlen chuan dar 11 a ri tep.

Pathianni

Ka classmate hlui state danga insawn tawh chu July 4th weekend a nih avanga rawn haw a awm a. Tlai lamah hangout turin kan in message a, lui bula kea kalna trailah chuan kan inhmu a. Kan inhmuh chuan,

“Tunlai I workout thin em ni? Pandemic workout?” tiin mi zawt a.

“Tlem”

Kan kal tan deuh chiah tihah, mi pa pakhat chu eng emawin a lo seh a ni awm e. Kawng sirah chuan a lo thu a, a thiante 3 chuan an lo hual a. “Antihistame [thak damdawi] in nei em?” tiin nu pakhat chuan min lo zawt a. Kan nei lo, mahse ka thianpain herbs chungchang a hriat avang chuan hnah chi khat a va lo chawp chu pek a tum a. Chu pa bialnu ni awm tak chuan a duh lova, phone-ah 911 nen an inbiak avang chuan nghah a duh zawk a. Phone operator nen an inbiak atang chuan chu pa awmdan – a thak a ti a, a vun a bawl a, thawk a harsa. Thawk a harsa a tih chuan coronavirus mi hriatchhuah tir a, midang pawhin an ngaihtuah ve ngei ang.

Tih theih dang kan neih loh avang chuan trail chu kan zawh san a, a hnu deuh lawkah lui chu kan thleng. Luiah chuan tui cheng an lo awm a, kayak leh rubber tube chunga chuang, nghakawi nena sangha man, thiante nena beer lo in te pawh. Nikhua a nuam bawk a, a hahdam khawp mai.

Lui chu khawpui atangin a hlat hmel hle a, amaherahchu ka in atanga minute 10 kal pawh a ni lo. Ka awmna piah deuha motor park ka hmuh teuh thin kha hemi vang a nih dawn hi tiin ka ngaihtuah chhuak a. Lui a kal turin motor park na hmun hran hranah a awm niin.

“Ka haw leh hmain tui cheng turin rawn kal leh ka tum ang” tiin ka thianpa chuan a sawi a. Tui chen ka zir a ngaih thu ka sawi ve thung. Dar 6 a rik hmain kan rawn thlenna motor park na hmunah chuan kan let leh tawh a, mahni in lama haw zai kan rel ta a.

In ka thlen chuan inbual that leh a ngai a, chaw ei leh tih tur neuh neuh a awm avangin zing dar 2 ka thleng.

Thawhtanni

Thawhtanni a ni leh ta. Dar 7:30 ah mut la chhuak deuhin ka tho a, hna ka tan nghal a ni deuh mai. Coffee ka insiam a, hnaah tih tur neuh neuh ka ti a. Blog post tur engmah ka la ziak lo, ziah ngun deuh ka tum laiin ka chhunzawm rei dawn lo a ang hle mai. Dar 9 a rik hma chuan tun weekend a thilthleng kha thlalak ka nei bawk a, ka han ziak zawk ang e tiin ka ziak tan a.